मुख्य-2 समाज

मिडिया काउन्सिल विधेयक विरुद्ध पत्रकारहरु एकजुट भएर अघि बढ्नुपर्नेमा जोड

जनकपुरधाम, जेठ १ गते ।

प्रेस तथा अभिव्यक्ति स्वतन्त्रतालाई कुण्ठित गर्न संघीय सरकारले ल्याएको मिडिया काउन्सिल सम्बन्धी विधेयकको विरुद्धमा सबै पत्रकार एकजुट भएर अघि बढ्न एक कार्यक्रममा वक्ताहरुले जोड दिएका छन् । बुधबार नेपाल पत्रकार महासंघ प्रदेश नं. २ समितिले जनकपुरमा आयोजना गरेको ‘राष्ट्रिय समृद्धिका लागि संचार स्वतन्त्र, सुरक्षित र व्यवसायिक पत्रकार’ विषयक अन्तरक्रियामा सहभागि पत्रकारहरुले सरकारले सदनमा पेश गरेको मिडिया काउन्सिल विधेक फिर्ता लिन माग गरेका छन् ।

महासंघ प्रदेश २ की उपाध्यक्ष रिंकुमिश्र गायत्रीको अध्यक्षता तथा बरिष्ट पत्रकार एवं स्वतन्त्रता सेनानी राजेश्वर नेपालीको प्रमुख आतिथ्यमा भएको थियो । कार्यक्रममा प्रमुख अतिथिको आशनबाट बोल्दै बरिष्ट पत्रकार नेपालीले अहिलेको संघर्षमा सबै पत्रकार एकजुट भएर अगाडी बढ्नुको विकल्प नभएको बताए । उनले प्रेस स्वतन्त्रता कसरी मजबुत हुने र जनताको आवाजलाई कसरी बढीभन्दा बढी लेख्न सकिन्छ त्यस तर्फ अग्रसर हुन आग्रह गरे ।

सरकार दुई तिहाइको दम्भमा सञ्चार र सञ्चारकर्मीलाई तर्साएर भ्रष्टाचारमा लिप्त हुन चाहेको आरोप समेत लगाए । नेपाली सञ्चार जगतलाई सम्वर्धन र सहयोग गर्नुपर्नेमा सरकारले मिडिया काउन्सिल विधेयक ल्याएर पत्रकार र सञ्चारमाध्यमलाई तर्साउन खोजेको उनको आरोप छ । जुनसुकै सरकारले सञ्चार र पत्रकारलाई दवाउन खोजेकाले त्यसबाट भयभित नभएर सशक्त रुपले कलम चलाउनुपर्ने वरिष्ट पत्रकार नेपालीको भनाई छ ।

यस्तै कार्यक्रममा नेपाल पत्रकार महासंघ धनुषाकी उपाध्यक्ष मनिका झा, प्रेस युनियन धनुषाका अध्यक्ष एवं प्रादेशिक समितिका सदस्य राजन सिंह, पत्रकार शैलेन्द्र क्रान्ति लगायतले मेडिया काउन्सिल विधेयक विरुद्ध एकजुट भएर अघि बढ्नुपर्नेमा जोड दिएका थिए । कार्यक्रमको संचालन प्रादेशिक समितिका महासचिव किरण कर्णले गरेका थिए ।

mm
टुडे पाटी
प्रदेश २ भित्रको ताजा तजा विश्वसनीय समाचारको लागि लगईन गर्नुहोस्
http://todaypati.com

Leave a Reply

Your email address will not be published. Required fields are marked *