ब्रेकिङ्ग राष्ट्रिय

परिषदद्वारा लोकसेवा आयोग विरुद्ध आन्दोलनको घोषणा, साउन २ र १० गते नेपाल बन्द

टुडेपाटी समाचारदाता-
काठमाडौं, असार २६ गते ।

लोकसेवा आयोगले स्थानीय तहको लागि गरेको कर्मचारी भर्ना सम्बन्धी विज्ञापन विरुद्ध तराई मधेश राष्ट्रिय परिषदले आन्दोलनको घोषणा गरेको छ । परिषदले साउन २ र १० गते नेपाल बन्दको समेत घोषणा गरेको छ ।

संविधानको मूल मर्म र समानुपातिक समावेशी सिद्धान्त विपरित प्रकाशित गरिएको लोकसेवा आयोगको असमावेशी विज्ञापन र प्रकृया तुरन्त रद्द गरी आरक्षण सुनिश्चितता सहितको विज्ञापन अविलम्ब पुनः प्रकाशित गराउन विवेदकारी राज्यसरकारको एकमात्र विकल्प आन्दोलन भएकोले तराई मधेश राष्ट्रिय परिषदले आरक्षण बचाऔ आन्दोलनको चरणबद्ध कार्यक्रम घोषणा गरेको हो ।

संघिय गणतन्त्र नेपालको संविधान बिपरित, समानुपातिक समावेशी सिद्धान्तको भावना र आरक्षणको मर्मविपरीत लोकसेवा आयोगले विज्ञापन निकालेको भन्दै टिएमएनसीले आन्दोलनको कार्यक्रम घोषणा गरेको हो । संविधानप्रदत्त आरक्षण सुनिश्चित गर, राज्य व्यवस्था समितिको निर्देशन पालना गर, आरक्षण सुनिश्चित गरी पुनः विज्ञापन गर’ लगाएतका नारासाथ मधेशी, आदिवासी जनजाति, मुश्लिम, दलित, अपांगता भएको व्यक्ति, महिला र पिछीडिएका क्षेत्रको तर्फबाट संयुक्त रूपले विरोध प्रर्दशनमा उत्रिने भएका छन् ।

नेपालको संविधानमा भएको समावेशी व्यवस्थालाई पूर्ण कार्यान्वयन हुनुपर्ने माग गरेको जानकारी गराउदै “लोकसेवा विरुद्ध पहिलो दिन विशाल जनप्रदर्शन प्रदर्शन” सु-सम्पन्न हुने, असार २९ गते काठमाडौ उपत्यकाको विभिन्न स्थानमा मसाल जुलुस, असार ३१ गते माइतीघर मण्डलामा विशाल जनप्रदर्शन, साउन २ र १० गते नेपाल बन्द घोषणा गरिएको परिषदको सदस्य समाजिक अभियन्ता सरोज रायले पाकिस्तानबाट फोन मार्फत जानकारी दिए ।

रायको भनाई अनुसार “जब सरकारले हाम्रो कुरा सुन्दैन, प्रशासनले सुन्दैन, प्रहरीले सुन्दैन तब हामी बडो विश्वासको साथ न्यायपालिका जान्छौं, तर न्यायपालिकाले पनि सुन्दैन भने आन्दोलन नै विकल्प रहन्छ।” यस्तै परिषदका सदस्य आनन्द गुप्ता भनाईमा “लोकसेवाको विज्ञापन समाजिक न्यायको खिलाप रहेको छ, यो सम्पूर्ण उत्पिडीत समुदाय र समाजको भविष्यको सवाल रहेको छ, हाम्रो अस्तित्वको सवाल रहेको छ ।” परिषदका अर्को सदस्य काशिन्द्र यादवले भने “यो नेपालमा एकल जातीय अधिपत्यलाई निरन्तर राख्ने कुत्सित नियतबाट निर्देशित छ । संसद, लोकसेवा र अदालत समेत सबैको यस षड्यन्त्रमा मिलोमतो देखिएकोले अब हामीसंग सडक संघर्ष र आन्दोलन बाहेक कुनै बाटो रहेन ।“

तराई मधेस राष्ट्रिय परिषद , आदिवासी जनजाति महासंघ, दलित महासंघ, आदिवासी जनजाति महिला महासंघ, अपांग महासंघ, पिछडिएका क्षेत्र, पार्टी निकट अदिवासी मोर्चा, कुमार लिङ्देन मिराक नेतृत्वको संघीय लोकतान्त्रिक राष्ट्रिय मंच, थारु कल्याणकारी सभा, थरुहट राष्ट्रिय भेला तयारी समिति एकताबद्ध भएर लोकसेवा विरुद्ध विशाल जनप्रदर्शन गर्ने भएको छ ।

यस्तो छ आन्दोलनका कार्यक्रमहरु:

१. २०७६ असार २८ गते- प्रचार-प्रसार र पर्चा वितरण काठमाडौं उपत्यकालगायत देशका विभिन्न ठाउँहरूमा ।

२. २०७६ असार २९ गते- साँझ मसाल जुलुस काठमाडौं उपत्यकालगायत देशका विभिन्न ठाउँहरूबाट ।

३. २०७६ असार ३० गते- साँझ सिठ्ठी जुलुस काठमाडौं उपत्यका लगायत देशका विभिन्न ठाउँहरूबाट ।

४. २०७६ असार ३१ गते- उपत्यकाको विभिन्न ठाउँहरूबाट जुलुससहित विशाल जनप्रदर्शन माइतीघर मण्डला र देशैभर ।

५. २०७६ साउन २ र १० गते- नेपाल बन्द । टिएमएनसी परिवारले आन्दोलनलाई सहयोग गर्न र आ-आफ्नो ठांउबाट आन्दोलनको नेतृत्व लिन अपिल गरेका छन्।

mm
टुडे पाटी
प्रदेश २ भित्रको ताजा तजा विश्वसनीय समाचारको लागि लगईन गर्नुहोस्
http://todaypati.com

Leave a Reply

Your email address will not be published. Required fields are marked *